信貸評級影響買樓？教你「洗底」貼士

要申請信用卡、甚至買樓按揭，成日都聽到要檢查申請人嘅「信貸評級」，究竟信貸評級係咩嚟？對你日常生活有幾重要？點樣先睇到自己嘅評級？

信貸評級簡單嚟講， 就係一個人喺財務上係咪「信得過」。信貸評級是根據客戶的理財習慣、信貸紀錄等方面作出評分的等級。如果有任何信貸帳戶 (包括信用卡、按揭 、貸款等) ， 你就會有份個人信貸報告。信貸報告紀錄了你的信貸評分。唔好睇少呢個評級， 銀行或財務公司都會查閱申請人嘅信貸評級， 繼而審批各項申請， 係個非常重要嘅指標。

點樣制定信貸評級？評級點先算好？

全港現時只有環聯信貸公司 (環聯, TransUnion) 提供信貸評級服務，環聯會根據信貸帳戶種類、還款紀錄、信貸紀錄長短、總結餘同新開立信貸帳戶等方面作出評估，而信貸帳戶包括信用卡、按揭、貸款等。

整個評級分為A至J共10級，A至C級屬於良好，而I至J級是欠佳，有機影響申請信用卡、按揭同貸款嘅結果，同日常生活息息相關。

信貸評級「洗底」貼士

信貸評級個Grade唔夠靚，有無方法升呢？以下就有4個貼士：

1. 準時還款及繳清款項

之前提到還款紀錄會影響信貸評級，所以準時交卡數或還貸款好重要，建議使用自動轉賬避免遲交錢。如果每次只還Min-Pay (最低還款額)，都會令財務機構懷疑你嘅還款能力，影響信貸評級。

2. 切忌同時申請多張信用卡

短時間內申請多張信用卡會令人覺得你需要大量信用額，係咪財務周轉有困難呢？呢一點對於信貸評級都有影響！

3. 使用信用卡不多於一半信貸額

環聯建議，每張信用卡最多使用約50%嘅信貸額，咁就少啲機會被質疑消費習慣同財務情況。

4. 建立適量信貸帳戶

雖然要小心使用信用卡，但有卡勝無卡！完全無信用卡會令你無任何信貸紀錄，銀行或財務公司就無從參考啦。